خلاااااااااااااااااص هاتجنن

انا جاي النهارده اتكلم في موضوع مش عارف ان كان مهم و الا لا
بس بصراحه الموضوع كله علي بعضه حرق دمي و ماحدش يسأل ليه
طبعا كلكم سمعتم عن موضوع الجملين اللي تم ذبحهم في حديقة الحيوانات اللي في الجيزة
انتم لو بصيتم للموضوع هاتلاقوا انه محير جدا جدااااااااااااااااااا
طبعا عارفين ان اللي اندبح انثي ( في الحالتين ) و الاتنين كانوا حامل
و برضه عارفين ان الجمل المغربي نادر شويه
يعني انتو عارفين كل حاجه و انا اصلا جاي اوجع دماغكم علي الفاضي
المهم
طبعا الموضوع حير البوليس و حير ادارة الحديقة و حيرنا احنا كمان لان الجمال بعد ما اندبحت كل اللي اتاخد منهم الكتف بس
و الله حاجه غريبه فعلا
يعني داخل يدبح جمل و يختار الانثى الحامل بالتحديد و ياخد منها جزء صغر و علي فكره الجزء ده يعتبر من اسوأ الاجزاء في الجمل
ده علاوه علي ان لحم ذكر الجمل افضل من لحم الانثى
المهم
مش هاطول عليكم في الرغي اكتر من كده
طبعا الظاهر ان البوليس المصري الهمام فشل في حل القضيه و ماعرفش يوصل كويس للشخص اللي ورا العمليه دي
فوجئت يوم الخميس اللي فات بخبر في صفحة الحوادث في جريدة الجمهورية انه تم القبض علي الفاعل الاثيم اللي قدر يدخل الحديقه و يدبح الجملين و يخرج من غير ماحد يحس بيه
مين بقا الفاعل ؟؟؟ خدوا بالكم معايا شويه
جزار من منطقة بين السرايات بيمر بضائقه ماليه !!!!! و مش قادر يشتري لحمه علشان يبيعها
يا سلاااااااااااااااااااااااااااااام
جميل قوي
خدوا بقا بالكم جزار ( يعني خبير في اللحوم ) يدخل الحديقه من غير ماحد يحس بيه و يدبح انثى الجمل اللي هي حامل ، و ياخد الكتف بس اللي هو زي ما قلنا من اسوأ قطع اللحم في الجمل و يخرج
طيب
لما هو جزار هل مش عارف ان لحم الذكر افضل من لحم الانثى ؟! و هل يعني هو مش عارف ان الكتف مش مطلوب قوي وانه لو خد الفخده يبقا احسن علي الاقل هايعرف يبيعها و كمان وزنها اكبر
و اشمعنى كمان في الحالتين اختار الانثى الحامل
طبعا دلوقتي هاتسألوني خرج من الحديقه ازاي
هاقولكم
قال نط السور ( و هو شايل اللحمه ) و وقف تاكسي ( يعني مش محضر معاه عربيه كمان علشان يعرف يهرب بسرعه !!!! يا سلام
المهم انه اخد التاكسي و راح باع اللحمه لجزار تاني
و كمان ما كانش معاه فلوس يدفع اجرة التاكسي واداه حتة لحمه وزنها اتنين كيلو بدل من الاجره
بذمتكم القصه علي بعضها مش غريبه شويه
انا بقالي يومين بافكر فيها و باجيبها علي كل ناحيه اني اصدقها مش قادر

طيب يا سعادة البوليس الهمام انت مش عارف توصل للحقيقة
مش عيب
يبقا لما تيجي تفبرك قصه و حكايه فبركها صح
احترم عقليتنا يا اخي
هو لا احترام آدمية الانسان و لا كمان عقله

روحوا منكم لله

ملحوظه

لو عاوزين تقروا التفاصيل

ادخلوا هنا