حوار الطرشان

الاول و قبل اي حاجه

كل عام و انتم بخير

و يارب تكونوا كلكم قضيتوا ايام عيد جميلة مليانه بالخير و الكرم

انا النهارده جاي اتكلم في موضوع القمح

آه القمح

مالكم مستغربين ليه

ما تعرفوش القمح ؟؟؟؟ و الا يمكن ما تعرفوهوش

طبعا القمح هو من اهم الحبوب الغذائيه بالنسبه لينا كمصريين

سعر القمح ارتفع عالميا لحد ما وصل لـ 420 دولار تقريبا

يعني ما يساوي 2300 جنيه تقريبا

طيب و ايه المشكله يعني ؟؟؟؟

المشكله اننا قدام صراع بين اتنين من الساده الوزراء

واحد ( اللي هو وزير الزراعه ) مصمم علي ان استيراد القمح اسهل من زراعته

و التاني ( اللي هو وزير التضامن ) مصمم ان التوسع في زراعة القمح مهمه جدا علشان ماحدش يتحكم فينا

كلام جميل جدا جدا جدااااااااااااااااااااا

تعرفوا بقا الحكومة بتاعتنا بتاخد القمح من الفلاح بكام

بـ 750 جنيه فقط لا غير

طبعا ده خلى الفلاحين يمتنعوا عن زراعة القمح لان السعر بالنسبه ليهم غير مجزي و ما يعوضش التعب و المصاريف اللي بيتحملوها لزراعة هذا المحصول اللي هو حيوي جدا

اضطرت حكومتنا المباركه انها تتوسع في استيراد القمح علشان تعوض النقص

و طبعا لان سعر القمح عالميا ارتفع بشكل كبير جدا ده ادى لارتفاع سعر الدقيق

طيب الحكومه دي ماحدش فيها فاهم ان الموضوع ده هايؤثر علي الشعب الغلبان الطيب ده

يعني بدل الحكومه ما تستورد القمح من دول خارجيه بسعر يقترب من 2500 جنيه تشجع الفلاح علي الزراعه عن طريق رفع سعر توريد القمح

يعني هايحصل ايه مثلا لو رفعنا سعر توريد القمح للفلاح من 750 جنيه لحد 1500 جنيه مثلا

مش ارخص من استيراده من الخارج

و بكده نشجع الفلاح علي الزراعه لان سعر البيع هايحقق للفلاح مكسب كويس

لكن الظاهر ان السيد الفاضل وزير الزراعه شايف ان الفلاح الفرنسي او الامريكي او الاسترالي من حقه يكسب و يعيش عيشه فل

لكن الفلاح المصري لازم يضحي و يجوع و يتسجن كمان علشان الشعب ياكل

حقيقي مش عارف اكتب ايه و لا اقول ايه لاني شايف ان حكومتنا الكريمه بتتفنن في تعذيب و تجويع الشعب ده

اللي هو فعلا مطحون و مغلوب علي امره

يعني الحكومه بتنادي ان الشعب يقاطع اي منتج يرتفع سعره بشكل مبالغ فيه

و الله كلام صح جدا و جميل قوي

بس الحكومه ما قالتش ازاي مثلا نقاطع الفول و العيش و اعتقد ان الحاجات دي اقل و سائل تضمن للناس الاكل و الحياه

مش لاقي حاجه اقولها غير

حسبي الله و نعم الوكيل